रामदेव बाबा अनेकदा भाजप आणि पंतप्रधान नरेंद्र मोदी यांच्यावर स्तुती सुमने उधळत असतात. पुन्हा एकदा एका मुलाखतीमध्ये योगगुरु रामदेव बाबांनी पुढची १० ते २० वर्षे नरेंद्र मोदींना पर्याय नाही असं वक्तव्य केलं आहे. त्यांनी मी मोदींचा भक्त नाही पण एक राष्ट्रभक्त नक्कीच आहे. सोबतच पंतप्रधान नरेंद्र मोदी हेदेखील राष्ट्रभक्त आहेत त्यामुळे पुढची १० ते २० वर्षे त्यांना काहीही पर्याय नाही असं बाबा रामदेव यांनी म्हटलं आहे.
रामदेव बाबांना प्रश्न विचारण्यात आला होता की देशात मोदी फॅक्टर आहे का? त्यावेळी त्यांनी हे उत्तर दिलं आहे, “कोट्यवधी लोकांना पंतप्रधान नरेंद्र मोदींवर विश्वास आहे. त्यांच्यात आणि इतर राजकारण्यांमध्ये जमीन असमाणाचा फरक आहे. सगळ्या देशाला हे ठाऊक आहे की मोदींना स्वतःसाठी काहीही नको आहे जे काही करायचं आहे ते देशासाठी करायचं आहे. प्रभू कृपेने त्यांना हे सगळं काही मिळालं आहे. ” असंही बाबा रामदेव म्हणाले. इतकंच नाही तर भारताच्या राजकारणात सध्या पुढच्या १० ते २० वर्षांसाठी तरी मला मोदींना कोणताही पर्याय नाही असं त्यांनी म्हटलं आहे.