रविवारी दुपारी 2.45 च्या सुमारास पुण्यात भारती विद्यापीठ पोलीस ठाण्यात एक धक्कादायक प्रकार घडला आहे. एका महिलेस चौकशीसाठी भारती विद्यापीठ पोलीस ठाण्यात बोलवले होते. त्यावेळी तिने पोलीस ठाण्यातच आत्महत्येचा प्रयत्न केला आहे. याप्रकरणी पोलीस शिपाई पूजा लोंढे यांनी तक्रार दाखल केली आहे. या महिलेचे नाव उज्वला भाऊ चोरगे (वय 30) असे आहे.
एका गुन्ह्याबाबत चौकशीसाठी बोलाविल्याने महिलेने भारती विद्यापीठ पोलीस ठाण्यातील स्वच्छतागृहातील आरशाची काच फोडून आत्महत्येचा प्रयत्न केला. पोलिसांनी दिलेल्या माहितीनुसार, भारती विद्यापीठ पोलीस ठाण्यात एक गुन्हा दाखल आहे. या गुन्ह्याबाबत चौकशीसाठी पोलिसांनी उज्वला यांना पोलीस ठाण्यात बोलाविले होते. त्यानंतर लघुशंकेचा बहाणा करत त्या पोलीस ठाण्यातील महिला स्वच्छतागृहात गेल्या आणि तेथील आरशाची काच फोडून त्यांनी आत्महत्येचा प्रयत्न केला आहे. याप्रकरणी त्यांच्याविरुद्ध गुन्हा दाखल करण्यात आला आहे.