हिवाळी अधिवेशानात धनगर समाजाच्या प्रश्नांकडे सरकार लक्ष देत नाही या कारणांमुळे भाजपचे आमदार गोपीचंद पडळकर खास धनगरी वेशभुषा करुन आणि ढोल वाजवत आंदोलन केले आहे. धनगर समाजाचा सरकारला विसर पडला आहे असे म्हणत आज भाजपचे नेते गोपीचंद पडळकर यांनी विधिमंडळाबाहेर आंदोलन केले आहे. मागण्यांचा एक फलक गोपीचंद पडळकर यांनी हातात घेतला होता, या सोबतच ढोल वाजवत पडळकर यांनी आंदोलन केलं. त्यानंतर पडळकर यांच्याकडील फलक पोलिसांकडून काढून टाकण्यात आला.
धनगर समाजाला आरक्षण देण्यासाठी महाविकास आघाडी सरकार गंभीर नाही, असे पडळकर यांनी यावेळी सांगितले. तसेच महाविकास आघाडी सरकार सत्तेत आल्यापासून धनगर आरक्षणाच्या प्रश्नावर एकही बैठक घेतली गेली नाही. हे सरकार झोपलेले आहे. सरकारला जागे करण्यासाठी आज इथे ढोल घेऊन आलो आहे. ढोल हे आमचे पारंपरिक वाद्य आहे, त्यावर आमचे पारंपरिक कार्यक्रम चालतात. म्हणूनच ढोल वाजवून झोपेचं सोंग घेतलेल्या सरकारला जागं करण्याचा प्रयन्त केला. अशी प्रतिक्रिया त्यांनी दिली आहे.
ठाकरे सरकार धनगर, भटक्या विमुक्तांच्या विरोधातील आहे. तसेच महाराष्ट्रातील ओबीसी, भटक्या समुहाच्या १६ मागण्या असणारा बोर्ड माझ्या मागे लिहिला होता तो मोडला आणि ढोल वाजवण्यापासून रोखले. सरकारचा मी निषेध करतो. विश्वासघात करुन सत्तेत आलं असून या सरकारची दादागिरी चालू देणार नाही, असं गोपीचंद पडळकर यांनी म्हटलं आहे. तसेच आमची ही लोककला आहे आणि कारण नसताना पोलिसांनी सरकारच्या सूचनेनुसार रोखले. मी सरकारचा निषेध करतो,’ असे पडळकर यावेळी म्हणाले.